stefnumótandi áætlun í málefnum sveitarfélaga fyrir árin 2024--2038 og aðgerðaáætlun fyrir árin 2024--2028.

Frú forseti. Ég þakka hæstv. innviðaráðherra fyrir svörin. Ég held að það sé alveg ljóst að það þarf að finna niðurstöðu í þessu samtali á milli ríkis og sveitarfélaga þannig að flest geti sæmilega við unað, af því að það er ekki gott ef ekki er sameiginlegt álit til að vinna með og enn er uppi ágreiningur um þessi mikilvægu atriði. Mér finnst við hafa verið frekar föst í þessu fari nokkuð lengi hér á Íslandi og einhvern veginn ekki getað, frá því að t.d. málaflokkur fatlaðs fólks var fluttur til sveitarfélaganna fyrir meira en tíu árum, náð utan um þann fjárhagsvanda sem skapaðist hjá sveitarfélögunum við tilfærsluna vegna þess að um hana var kannski ekki samið eins og hefði þurft að gera. Því er þetta auðvitað lykillinn að því að sveitarfélögin geti náð árangri, að ríkið axli þá ábyrgð og hér sé gengið til samninga sem hægt er að vinna eftir til langs tíma.

Ég ætlaði að spyrja út í jöfnunarsjóðinn en held ég sleppi því. Mig langaði hins vegar að nota tækifærið til að inna hæstv. ráðherra eftir því sem hér er sagt um búsetufrelsi. Við vitum að víða eru uppi kröfur, sérstaklega þar sem eru stórar sumarhúsabyggðir, um að vera þar með búsetu og fá þá þjónustu sem sveitarfélög veita, samt ekki endilega með því móti að fólk hafi þar lögheimili vegna þess að þar er t.d. ekki heilsársbyggð. Mig fýsir að vita hvaða skoðanir ráðherrann hefur á þessum hugmyndum um aukið búsetufrelsi, af því að um leið og ég skil hvað það fólk er að fara sem hefur áhuga á því þá snýst þetta auðvitað líka um að rekstur sveitarfélagsins geti staðið undir sér.