kjör íslenskra lífeyrisþega sem búsettir eru erlendis.

Virðulegur forseti. Ég þakka hæstv. forsætisráðherra fyrir svörin. Þessi hópur öryrkja og aldraðra sem er búsettur erlendis hefur þegar verið sviptur heimilisuppbót, aldursuppbót, framfærsluuppbót … Það er búið að taka af þessu fólki fyrir það að flýja land. Ég spyr: Nú eru þessir einstaklingar þarna og það er eingöngu Tryggingastofnun ríkisins sem er að taka persónuafslátt af þessu fólki, en hvað með þá einstaklinga sem fá 60% frá lífeyrissjóði og 40% frá Tryggingastofnun? Það er bara tekið af þeim sem fá frá Tryggingastofnun með skattkort en ekki af þeim sem fá frá lífeyrissjóði. Hvernig í ósköpunum getum við búið til svona kerfi og sagt að það sé eitthvert réttlæti í þessu? Við erum að mismuna fólki gróflega. Ég trúi ekki öðru en að þetta verði dregið til baka. Við getum ekki leyft okkur að nota persónuafslátt, 65.000 kr., til að klekkja á þessu fólki. Fólk var í öngum sínum. Og þetta er gert örfáum dögum fyrir áramót og það eru engar upplýsingar. (Forseti hringir.) Fólk er hvergi upplýst um þetta (Forseti hringir.) fyrr en á síðustu stundu. Meira að segja var þetta svo gróft að það var tekinn persónuafsláttur af fólki í tvo daga, (Forseti hringir.) tekinn af því, sem er ólöglegt.