hættumat vegna ofanflóða.

Virðulegi forseti. Ég þakka hv. þingmanni fyrir fyrirspurnina. Unnið er að endurskoðun hættumats vegna ofanflóða á svæðum þar sem þegar hafa verið reist varnarmannvirki. Í kjölfar snjóflóðanna árið 2020 á Flateyri var farið í endurskoðun á rýmingarsvæðum og viðmiðum um rýmingar á Flateyri og einnig almennt undir varnargörðum. Hafist var handa við að koma upp reiknilíkani sem kallað er OpenFOAM til að herma snjóflóð sem falla á varnargarða. Þar er um að ræða nýja nálgun í líkanreikningum snjóflóða sem eldri reiknilíkön ráða ekki við. Þessi innleiðing er mjög langt komin og er búið að gera líkanreikninga fyrir flesta staði þar sem eru varnargarðar. Niðurstöður þessarar vinnu eru nauðsynlegar fyrir endurskoðun hættumats þar sem reist hafa verið varnarvirki og hefur áherslan undanfarin misseri verið á staði þar sem leiðigarðar eru. Í framhaldi af því verða staðir þar sem þvergarðar hafa verið reistir endurskoðaðir og vonir standa til að sú vinna hefjist á næsta ári. Gert er ráð fyrir að það taki allt að þrjú ár að ljúka endurskoðuninni og að niðurstöður fyrir svæðið þar sem leiðigarðar eru liggi fyrir á næsta ári og jafnframt að vinna við svæði þar sem þvergarðar hafa verið reistir geti hafist eins og fyrr greinir.

Varðandi skipulagningu nýrra íbúðalóða á svæðum sem varin eru af snjóflóðavarnargörðum er rétt að minna á að þrátt fyrir að varnir séu hannaðar og reistar með það í huga að öryggi fólks neðan þeirra sé ásættanlegt ber sveitarstjórn að leitast við að stýra skipulagsgerð og þróun byggða með tilliti til ofanflóðahættu.

Ég held að þetta sé mjög mikilvægt miðað við það sem við erum að sjá í þeim skýrslum sem við höfum verið að gefa út. Fyrsta skýrslan — það voru þrjár skýrslur á síðasta ári, við vorum með náttúruvána og sömuleiðis aðlögunarskýrsluna og vísindaskýrsluna — sýnir það sem við vitum og hv. þingmaður vísaði til, að við búum við náttúruvá á Íslandi og það mun ekki breytast. Það er enginn vafi á því að ef við hefðum vitað áður það sem við vitum núna þá hefðum við skipulagt byggð með öðrum hætti í landinu. En þess vegna skiptir miklu máli, og ég vil nota tækifærið hér til að ítreka það sem ég legg áherslu á, að sveitarfélög, sem eru með skipulagsvaldið, horfi alltaf til þessara þátta, ekki síst þegar við erum að skipuleggja byggð. Það er alveg númer eitt, tvö og þrjú þegar við erum skipuleggja byggð og atvinnusvæði því að náttúruvá er ekki að fara frá okkur Íslendingum, svo mikið er víst.

Það er rétt að geta þess að þrátt fyrir að endurskoðun hættumats liggi ekki fyrir þá geta sveitarstjórnir sent inn fyrirspurn til Veðurstofunnar varðandi skipulagsmál og almennt og þess vegna fundaði ég með öllum landshlutasamtökum sveitarfélaga, m.a. til að vekja athygli á því að þegar við erum að skipuleggja okkur, þ.e. sveitarfélögin sem fara með skipulagsvaldið, á ávallt að líta til bestu mögulegu upplýsinga. Ég held að maður þurfi ekki að útskýra það þegar við erum að fara í gegnum þessa alvarlegu hluti sem við erum að upplifa núna að við verðum að huga að því alls staðar að skipuleggja byggð og önnur mannvirki þannig að sem allra minnstu líkur séu á því að þau verði fyrir þeirri náttúruvá sem við Íslendingar höfum búið við, búum við og munum búa við.