Palestínubúar sem fengið hafa dvalarleyfi á Íslandi á grundvelli fjölskyldusameiningar.

Virðulegur forseti. Þegar hæstv. utanríkisráðherra var inntur svara við því hvort stæði yfir höfuð til af hálfu ráðherra að senda fulltrúa íslenskra stjórnvalda til þess að bjarga íslenskum dvalarleyfishöfum, þar á meðal yfir sjöunda tug barna, af Gaza þar sem hundruð manneskja eru drepin á hverjum degi svaraði ráðherra, með leyfi forseta:

„Endanleg ákvörðun í því máli hangir saman við það að við náum og trúum því að við getum náð utan um þá stöðu sem er orðin alvarleg á Íslandi.“

Ráðherrann var þar að vísa í að hann líti svo á að kostnaður við móttöku og brottvísun flóttafólks væri orðinn allt of hár og áréttaði þá afstöðu sína að innviðir á Íslandi væru sprungnir vegna komu flóttafólks hingað til lands. Látum þessar fullyrðingar ráðherrans eiga sig í bili. Spurning mín snýr eingöngu að þeirri fullyrðingu ráðherrans að endanleg ákvörðun um hvort koma eigi konum og börnum frá Gaza í faðm fjölskyldu sinnar hér á Íslandi eins og þau eiga rétt til hangi saman við það að formaður Sjálfstæðisflokksins nái fram vilyrðum um breytingar á útlendingalögum og framkvæmd þeirra gagnvart samstarfsfólki sínu í ríkisstjórn.

Ég spyr ráðherra, sem segir þessa vinnu langt komna: Hvaða breytingar eru þetta sem hann vill ná fram?