aðgerðir til að viðhalda grunninnviðum á Suðurnesjum.
Virðulegi forseti. Það er einmitt ágætt að geta endað á þessu. Það er nefnilega svo mikilvægt að við höfum þá sterku sýn að þó að við þurfum virkilega að takast á við skemmdir og gera við alls konar skemmdir í innviðum veitna, vega eða hvað það er, þá er það einmitt verkefnið því að fram á við erum við að horfa til þess að á einhverjum tímapunkti gengur þetta yfir og ef þetta gengur yfir með þeim hætti að það verður ekki búið að skemma og eyðileggja hreinlega allt — tölum bara um Grindavík — þá eru gríðarleg verðmæti fólgin í því sem er í Grindavík. Þess vegna kem ég aftur að tillögu almannavarna: Það kom tillaga til dómsmálaráðherra um að halda áfram með þá varnargarða sem þar eru og það er verið að því og það er verið að gera við af því að ef við getum tryggt atvinnustarfsemina með einhverjum hætti, sem er þá þessi hafnsækni sem Grindavík byggðist upp í kringum fyrst, þá eigum við að gera allt sem við mögulega getum til þess. Það eru hreinlega svo mikil þjóðfélagsleg verðmæti fólgin í því og það er lykillinn að því að viðhalda verðmætunum í samfélaginu í Grindavík. Síðan erum við með ýmsar aðrar leiðir til að koma til móts við Grindavík og styrkja stjórnsýslu, fjárhag og annað í gegnum bæjarstjórnina, samkomulag sem við erum að gera, samningur sem við erum að gera við Grindavíkurbæ, samskipti við almannavarnir o.s.frv. En ég vil bara taka undir með hv. þingmanni að það er mikilvægt að við horfumst í augu við að það getur farið svo að allt fari nokkuð vel þrátt fyrir að það hafi gengið illa um tíma og þá eigum við að eiga möguleika á að halda áfram þeirri starfsemi sem þarna er.
