efnahagsstjórn og kjarasamningar.
Virðulegi forseti. Mig langar að spyrja hæstv. forsætisráðherra um kjarasamningana. Ég vil undirstrika að það er mikið fagnaðarefni að hér hafi náðst langtímakjarasamningar. Þeir veita ákveðinn fyrirsjáanleika og ekki síst er þetta mikilvægt fyrir þá sem hafa þurft á húsnæðisstuðningi að halda eftir ákveðna óstjórn af hálfu ríkisstjórnarinnar í landinu. Engu að síður er þetta fagnaðarefni. En ég tala um fyrirsjáanleika. Þá skiptir máli að það sé alveg skýrt að ríkisstjórnin segi hvernig hún ætlar að fjármagna 80 milljarða framlag ríkissjóðs til kjarasamninganna, hvernig það á að gerast. Það eru margir mánuðir síðan að ríkisstjórnin sjálf lýsti því yfir að hún ætlaði að stíga mynduglega inn í kjarasamningana. Það eru margir mánuðir síðan verkalýðshreyfingin sagði hverjar kröfur hennar væru. Síðan er blaðamannafundur núna til að kynna kjarasamningana og ekki talað skýrt um það hvernig ríkissjóður ætlar að fjármagna sína aðkomu. Það er svona uml um að beita eigi aðhaldi í ríkisrekstri, hugsanlega fara í sameiningar. Þessi ríkisstjórn hefur enga afrekaskrá þegar kemur að aðhaldi í ríkisrekstri eða hagræðingu í ríkisrekstri, sameiningu ríkisstofnana, bara enga. Það er því ekki þannig að ríkisstjórnin geti komið og sagt: Við ætlum bara að gera þetta einhvern veginn með aðhaldi. Við þurfum að fá ríkisstjórnina til að tala skýrt. Það er kaldhæðni örlaganna að kjarasamningarnir sjálfir eru að vinna til baka það sem slök efnahagsstjórn ríkisstjórnarinnar hefur valdið heimilum og fyrirtækjum í formi viðvarandi verðbólgu, lengur hér en annars staðar. Viðvarandi hærri vextir hér en annars staðar — þeir verða reyndar alltaf þrisvar sinnum hærri hér en annars staðar — eru afleiðing hagstjórnar þessarar ríkisstjórnar. En launþegar, verkalýðshreyfingin og almenningur í landinu (Forseti hringir.) á skýra kröfu um það að ríkisstjórnin svari skýrt hvernig hún ætlar að fjármagna framlag sitt, 80 milljarða. Er það með erlendum lántökum, sem ég vara eindregið við? Er það með hækkun skatta og gjalda eða er það með raunverulegu aðhaldi í ríkisrekstri, efni sem hún kann ekkert í?
