breyting á ýmsum lögum vegna endurskoðunar örorkulífeyriskerfis almannatrygginga.

Herra forseti. Ég þakka hæstv. ráðherra fyrir framsöguna. Margt af því sem hér hefur verið talið upp er til bóta, einföldun og annað sem að því lýtur. Í frumvarpi ráðherra er lagt til að fólk með hlutaörorkulífeyri eigi rétt á svokölluðum virknigreiðslum í tvö ár frá því að það hefur atvinnuleit. Að þeim tíma liðnum falla þessar virknigreiðslur einfaldlega niður og viðkomandi verður fyrir grimmilegri tekjuskerðingu.

Í frumvarpinu segir að hafi hlutaörorkulífeyrisþegi ekki fengið starf við hæfi með stuðningi Vinnumálastofnunar að lokinni 24 mánaða atvinnuleit geti hann óskað eftir samþættu sérfræðimati að nýju. Hvaða trygging felst í þessu fyrir örorkulífeyrisþega? Hvernig tryggir þetta að einstaklingurinn festist ekki til frambúðar í fátæktargildru með 285.000 kr. á mánuði eftir skatt? Hvernig ætlar ráðherra að sjá til þess að atvinnuveitendur muni t.d. ráða fólk með skerta starfsgetu þegar það hefur ekki fengið ráðningu í þessa 24 mánuði? Og kemur til greina, í meðförum frumvarpsins, (Forseti hringir.) að það verði látið ganga sjálfkrafa inn og allur vafi og vandi verði ekki settur í hendurnar (Forseti hringir.) á örorkulífeyrisþegum?