breyting á búvörulögum.

Herra forseti. Við þekkjum það auðvitað að matvælaráðuneytið hefur gert alvarlegar athugasemdir við það hvernig við högum okkar vinnu hér á Alþingi Íslendinga. Það eitt og sér er auðvitað alvarlegt mál, að framkvæmdarvaldið geri athugasemdir með þessum hætti, og við hljótum að kalla eftir því við forseta þingsins hver hans viðbrögð eru við þessu og ekki síður frá meiri hluta atvinnuveganefndar, vegna þess að það hefur einhvern veginn legið í orðum og verið sagt nánast berum orðum af hv. formanni nefndarinnar, Þórarni Inga Péturssyni, að hluta af lagasetningarvaldinu hafi í raun og veru verið útvistað til aðila úti í bæ við skrif á breytingartillögu og nefndaráliti sem gerbreyttu málinu og það er einmitt það sem matvælaráðuneytið er að gera alvarlegar athugasemdir við.

Það hefur líka komið fram hjá nýjum hæstv. matvælaráðherra, Bjarkeyju Olsen Gunnarsdóttur, að boltinn sé hjá þinginu og mér finnst að forseti þingsins þurfi að stíga inn, segja okkur frá því hvar hans afstaða í þessu máli liggur og ég kalla líka eftir því að meiri hluti atvinnuveganefndar upplýsi restina af þingheimi (Forseti hringir.) hvernig það megi vera að hluta af lagasetningarvaldi Alþingis sé útvistað til lögmannsstofu úti í bæ sem tengist einum hagsmunaaðilanum sem undir er í málinu mjög svo sterkum böndum.