verndar- og orkunýtingaráætlun.

Virðulegi forseti. Ég svaraði áðan á þann veg að ég mun flytja hér frumvarp um rammann með nýtingarkostum. Það hefur aldrei verið unnið jafn hratt í rammanum og núna, það liggur alveg fyrir. Hv. þingmaður talar hér eins og vindmylla hafi bara aldrei verið reist. Nágrannaríki okkar eru búin að gera þetta í áratugi. Ég hvet hv. þingmann til að fara með þessa ræðu til Noregs, Danmerkur og Norðurlandanna, Evrópu, Bandaríkjanna og Kanada og útskýra þessa miklu visku sem hv. þingmaður fer hér með. Þetta eru fréttir sem eiga erindi til heimsins alls, að vindorkan sé ekki græn orka. Það er mjög mikilvægt að hv. þingmaður noti afl sitt til þess að útskýra þetta fyrir heiminum. Hv. þingmaður getur ekki hlaupið frá eigin verkum og ef hv. þingmaður telur að ég fari frjálslega með staðreyndir þá skulum við bara rifja þetta upp og fara yfir það sem hv. þingmaður gerði sem hæstv. forsætisráðherra, bæði í orði og líka í gjörðum.

Þetta er enn eitt málið sem við leggjum fram til þess að hraða því að hægt sé að búa til græna orku vegna þess að við þurfum á grænni orku að halda. Vatnsafl, jarðvarmi vindur, birtuorka, vonandi sjávarföll í framtíðinni; við þurfum á mjög miklu að halda til að ná markmiðum okkar þegar kemur að kolefnishlutleysi og framþróun á Íslandi. Og okkur liggur á. Þess vegna er þetta lagt hér fram. En samt sem áður er frumvarpið þannig að það er verið að vernda þá hluti sem hv. þingmaður var að kalla eftir að þyrfti að vernda.