Orkusjóður.

Forseti. Hv. þingmaður fór ágætlega yfir þróunina sem átti sér stað þegar lög um opinber fjármál voru innleidd. Það breytir því hins vegar ekki að það er hægt að kveða á um það í lögum að ráðherra ákvarði fjárveitingu í samhengi við eitthvað annað. Það eru mörg dæmi um það og ég held að það hefði farið vel á því að halda því viðmiði í þessum lögum vegna þess að það sem hefur gerst á síðustu árum er að ríkisstjórnin hefur litið á þennan tekjustraum úr ETS-kerfinu sem fundið fé til ýmissa verkefna. Nú er t.d. talað um í fjármálaáætlun að ráðstöfun á losunarheimildum til flugfélaga, til að þau geti haldið áfram að fá endurgjaldslausar losunarheimildir, nemi 3,1 milljarði á næstu tveimur árum. Þetta er peningur sem með réttu hefði átt að fara í loftslagsvænar aðgerðir en er í staðinn að fara í að niðurgreiða flugfélögin. Þetta ræddum við fyrr í vetur þegar frumvarp þess efnis var afgreitt hér. Ég held að það hafi ekki verið það mesta heillaskref sem hefur verið stigið varðandi loftslagsmál hér inni.

Svo má líka nefna að ETS-kerfið er í sigtinu hjá ríkisstjórninni í gegnum svokallað sveigjanleikaákvæði þar sem verður hægt að millifæra tonnin sem eru afgangs í ETS-kerfinu yfir á samfélagslosunina til að minnka aðeins pressuna á raunverulega losun innan þess. Svona bókhaldsbrellur skila náttúrlega engu fyrir lofthjúpinn þótt þær kannski dragi úr hvata hjá metnaðarlitlum stjórnvöldum til að gera sitt.