fjármálaáætlun fyrir árin 2025--2029.

Frú forseti. Ég ítreka þá spurninguna um það hvenær sé að vænta niðurstöðu frá ráðuneytinu varðandi Akureyri sérstaklega. Ég veit að hæstv. ráðherra hefur ekki tíma til að fara yfir aðrar heilbrigðisstofnanir í svari sínu. Þó myndi ég vilja bæta við spurningu sem lýtur að atriði sem töluvert er rætt hér, og eðlilega og ég tel það skynsamlegt og gott, sem eru forvarnir, mikilvægi forvarna í heilbrigðiskerfinu, m.a. til að gera viðfangsefnið viðráðanlegra og þá sparar það peninga en forvarnir eru auðvitað fyrst og fremst til þess ætlaðar að fólk lifi heilbrigðara lífi og lifi lengur. En hvers er að vænta í tíð þessarar ríkisstjórnar varðandi sjálfstætt starfandi félög á sviði fíknivanda? Mun ríkisstjórnin auka stuðning sinn við þau samtök?