fjármálaáætlun fyrir árin 2025--2029.
Frú forseti. Ég mun fyrir mitt leyti veita hæstv. dómsmálaráðherra allan minn stuðning til að standa með löggæslunni í landinu. Þegar hæstv. dómsmálaráðherra stendur hér og talar um þau verkefni sem á ríkisstjórninni hafa dunið er það engu að síður staðreynd málsins að kominn var faraldur í fjárlög og fjármálastefnu þessarar ríkisstjórnar löngu fyrir heimsfaraldur. Það skiptir engu máli hverjar efnahagsaðstæður eru, þessi ríkisstjórn skilar fjárlögum ævinlega með hallarekstri. Það er ástæða þess að síðan þarf að fara í svona aðgerðir, að menn þurfi að tala um það sérstaklega að ekki eigi að höggva í heilbrigðiskerfið og nefna það sérstaklega að löggæslan fái frí í eitt ár. LRH fékk á sig aðhaldskröfu í fyrra, það birtist 115 millj. kr. krafa hjá embætti sem fær um 80% allra hegningarlagabrota á landinu og þjónar 250.000 manneskjum, það fékk á sig aðhaldskröfu. Það er ekki hægt að stilla dæminu upp þannig að þau okkar sem tala fyrir ábyrgum ríkisrekstri hljótum að fallast á að það eigi að kroppa í löggæsluna. Myndin er einfaldlega ekki sú.
