rannsókn vegna snjóflóðs sem féll í Súðavík 16. janúar 1995.

Hæstv. forseti. Þetta er í fyrsta sinn síðan lög um rannsóknarnefndir voru sett árið 2011 að Alþingi Íslendinga greiðir atkvæði um rannsóknarnefnd sem fjallar ekki um eftirmál hrunsins. Eins og fram hefur komið hafa aðstandendur og ástvinir þeirra sem létust í snjóflóðunum í Súðavík 16. janúar 1995 nú í tæplega 30 ár farið þess á leit við stjórnvöld með ýmsum hætti að gerð verði óháð rannsókn á tildrögum og aðstæðum þetta hörmulega kvöld og þessa nótt.

Við fengum þetta erindi til okkar síðastliðið ár í stjórnskipunar- og eftirlitsnefnd. Við vönduðum okkur mjög við þessa vinnu og lögðum okkur fram um að ná saman um þessa tillögu og það tókst eftir vandlega yfirlegu. Mig langar að þakka þingmönnum í hv. nefnd fyrir samstarfið. Það er ekki sjálfsagt að ná sameiginlegri niðurstöðu en ég held og vona að það verði til gæfu fyrir okkur öll að afgreiða þessa tillögu hér í dag.