viðvera fjármálaráðherra við umræðu mála.

Herra forseti. Það er kannski óvenjulegt að við séum að kalla eftir ráðherra við 2. umræðu máls en það endurspeglar þá óvenjulegu stöðu að ríkisstjórnin lítur á fjármálaráðuneytið sem einhvers konar skiptimynt. Hér erum við því með þriðja ráðherra í fjármála- og efnahagsráðuneytinu á þessum eina vetri, óstjórnin er slík. Þess vegna er mjög eðlilegt að ráðherra Framsóknarflokksins mæti í salinn og geri grein fyrir sinni afstöðu til málsins. Þegar þingflokksformaður Framsóknarflokksins stígur í pontu og segir að það standi ekki á þeim ráðherra þá stendur bara víst á honum, annars væri hann hér í sal þegar málið er tekið á dagskrá vegna þess að forseti setur dagskrána væntanlega í samráði við samstarfsflokkana í ríkisstjórn. Það stendur á fjármála- og efnahagsráðherra að vera hér í salnum. Ef eitthvað er að marka það sem þingflokksformaður Framsóknar segir, að hann myndi boðinn og búinn vilja vera hér í salnum, (Forseti hringir.) þá myndi þingflokksformaður einfaldlega biðja forseta um að fresta þessari umræðu þangað til ráðherra getur séð sér fært að vera hér í salnum. (Forseti hringir.) En nei, mögulega finnst Sigurði Inga Jóhannssyni þægilegra að fela sig í útlöndum meðan við ræðum timburmenn kosningaloforða Framsóknar. (Gripið fram í: Heyr, heyr.)