innviðir markaða fyrir fjármálagerninga sem byggjast á dreifðri færsluskrártækni.
Forseti. Hér dansar fólk á torgum úti. Það er verið að kenna einhvern samkvæmisdans hérna beint fyrir utan. Ég vil byrja á að þakka hv. þingmanni fyrir ræðuna. Þetta er auðvitað svolítið nýtt svið fyrir mörg okkar en þessi reglugerð sem er verið að innleiða með þessu frumvarpi tilheyrir náttúrlega stærri pakka, stafrænum fjármálapakka Evrópusambandsins sem var fyrst kynntur árið 2020. Það voru fleiri reglugerðir kynntar þá; það var reglugerð Evrópuþingsins og ráðsins frá 2022 nr. 2554, um stafrænan rekstrarlegan viðnámsþrótt fyrir fjármálageirann og viðbætur við reglugerðir 1060/2009, 648/2012, 600/2014, 909/2014 og 2016/1011. Síðast en ekki síst var það reglugerð Evrópuþingsins og ráðsins frá 2023 nr. 1114 um markaði fyrir sýndareignir og viðbætur við reglugerð 1093/2010, sem er nú talsvert eldri, og fleiri reglugerðir. Þar er helst ekki hægt að sleppa því að nefna reglugerð frá 2019 nr. 1937, svokallaða MiCA-reglugerð. Þessum stafræna fjármálapakka er ætlað að stuðla að því að umgjörð fjármálamarkaða mæti nútímaþörfum, eldri samkeppni og nýsköpun o.s.frv. Mig langar til að spyrja hv. þingmann í tilefni af umræðu sem við áttum áðan þar sem, eins og kemur fram í greinargerð með þessu frumvarpi, hér verið að innleiða þessa reglugerð eða taka hana upp í íslenskan rétt með hinni svokölluðu tilvísunaraðferð. Hún er þá að fullu innleidd samkvæmt orðanna hljóðan í samræmi við a-lið 7. gr. EES-samningsins eins og kemur fram í lögum um Evrópska efnahagssvæðið, nr. 2/1993. (Forseti hringir.) Það sem mig langar að spyrja hv. þingmann um er hvort hann kunni skýringu á því að hér er ákveðið að fara tilvísunarleiðina við innleiðingu reglugerðarinnar en ekki umritunarleiðina (Forseti hringir.) sem var farin í innleiðingunni sem við ræddum hérna fyrr í dag.
