breytingar á ýmsum lögum vegna eftirlits og leyfisveitinga Orkustofnunar.

Virðulegi forseti. Mér finnst þetta mjög áhugaverð spurning hjá hv. þingmanni. Og af því að ég sé að hér sitja nefndarmenn úr fjárlaganefnd inni í þessum sal þá er þetta atriði sem hefur verið töluvert til umræðu innan nefndarinnar og tilfinning mín eftir að hafa setið þar núna í tvö eða þrjú ár er sú að það er útbreidd innviðaskuld. Hún liggur alveg fyrir og fólk þekkir hana í samhengi við biðlista í heilbrigðiskerfinu, ástand vega og ég myndi setja löggæsluna í þetta samhengi. Er þetta tilviljun? Nei, ég segi að það sé ekki tilviljun að svona stendur á og svo gerist það auðvitað þegar málaflokkur sem hefur, eins og ég nefndi hér í upphafi, beinlínis goldið fyrir það hvernig ríkisstjórnin er samsett, að allt hefur verið í pólitísku kyrrstöðu. Síðan þegar málaflokkurinn springur út í pólitískri umræðu þá er voðalega auðvelt að benda á starfsfólkið og embættismennina sem sitja með matardiskinn fullan af verkefnum og rúmlega það.