Seðlabanki Íslands.

Frú forseti. Ég þakka fyrir þetta andsvar. Nú er það þannig að margt af því sem maður hefði ekki látið sér detta í hug að kalla innviði fyrir nokkrum áratugum er orðið að algerum lykilþætti í okkar lífi. Örugg og hröð greiðslumiðlun er alveg örugglega orðin einn af mjög mikilvægum innviðum, ekkert síður en rafmagn, nettenging, kannski ekki vatn, en aðrir slíkir hlutir. Frumvarpið er ekki langt en greinargerðin er þeim mun ítarlegri og þar er farið mjög rækilega yfir nauðsyn þess að leggja fram svona frumvarp. Mig minnir að það sé reifað t.d. hvað við vorum nálægt því að lenda í stórkostlegum vandræðum eftir bankahrunið 2008 vegna þess að umheimurinn ætlaði að loka á okkur. Við erum náttúrlega í veruleika sem einkennist af mikilli spennu og hótunum, fjölþáttaógnum. Af hverju segi ég þetta? Jú, vegna þess að allt þetta hlýtur að skipta gríðarlega miklu máli þegar við erum að ræða hluti eins og inngrip og innkomu ríkisins eða stofnana á vegum ríkisins inn á samkeppnismarkað. Þetta er einfaldlega hlutur sem skiptir okkur miklu máli.

Hins vegar tek ég undir með þingmanninum um það að það er ótrúlega skammsýnt að ætla ekki einu sinni að leyfa Seðlabankanum að innheimta kostnað við þá þjónustu sem fellur til við þessar greiðslur þannig að mér finnst eiginlega óskiljanlegt að þessi breytingartillaga hafi komið fram.