tillaga um breytingu á lögum um útlendinga.

Virðulegur forseti. Ég er þeirrar skoðunar að þeir sem koma til Íslands og fá til þess leyfi að dvelja hér geti ekki fengið endurnýjun dvalarleyfis og geti heldur ekki verið að vinna sér inn réttindi til þess á endanum að fá hér ríkisborgararétt, samkvæmt lögum um ríkisborgararétt, ef þeir gerast brotlegir við lög með alvarlegum hætti. Þetta er það sem ráðherrann var að vekja máls á.

Ég ætla ekki að fara að tjá mig hér um óséða tillögu frá Flokki fólksins um þetta efni. Það er alveg augljóst að það þarf að vanda til verka. En þetta á að vera ákveðinn tröppugangur. Þeir sem koma hingað til lands, t.d. í gegnum hælisleitendakerfið og fá dvalarleyfi á þeim grundvelli, eiga í sjálfu sér að vera undir sömu sök seldir og allir aðrir sem hafa t.d. fengið dvalarleyfi tímabundið til að stunda hér atvinnu. Við ætlum að gera kröfur til þessa fólks og ef það leiðist út á einhvers konar afbrotabraut þá ber að taka því mjög alvarlega. Það hlýtur að vera samstaða um það að þeir sem eru orðnir afbrotamenn, fremja alvarlega glæpi, hafa fyrirgert rétti sínum til að búa á landinu eða að óska eftir framlengingu dvalarleyfis eða eftir atvikum á endanum ríkisborgararétti. Svona sé ég þetta. Við skulum ekki tala um þetta þannig að það sé ekkert um þetta í lögunum vegna þess að ein af forsendum þess að fólk geti fengið ríkisborgararétt í framhaldi af dvalarleyfi er einmitt sú að það hafi ekki gerst brotlegt við lög og margar beiðnir hafa borist þinginu í gegnum tíðina á þeirri forsendu einni að viðkomandi hafði ekki uppfyllt skilyrðið að vera ekki brotlegur. En þingið hefur veitt margan ríkisborgararéttinn með þeirri undanþágu og horft í gegnum fingur sér með það, enda hafa þar þá verið minni háttar brot sem um hefur verið að ræða að jafnaði.