Seðlabanki Íslands.

Ég þakka hv. þingmanni fyrir mjög gott andsvar. Ég trúi því og treysti að hv. efnahags- og viðskiptanefnd taki þetta mál alvarlega fyrir og lagi þetta. En ég get alveg staðið við það við hv. þingmann að ef það gerist ekki þá mun ég svo sannarlega styðja það að fram komi breytingartillaga. Ég skal vera meðflutningsmaður á þeirri tillögu, hvaðan sem hún kemur.

Ég held að hv. þingmaður hafi virkilega snert á mikilvægum hlut sem er að við þurfum að bæta vinnubrögðin okkar hér inni. Að það séu átök á ríkisstjórnarheimilinu, slíkt getur alltaf gerst og við þurfum að finna leiðir til þess að löggjafarvaldið vinni betur þrátt fyrir einhverjar heimiliserjur í ríkisstjórninni hér á bak við okkur. Ég bara treysti því og trúi að ef hv. þingmaður kemst í ríkisstjórn næst þá muni hún vinna vel í því ásamt okkur hinum, sem vonandi verðum hér þá líka, hvort sem við erum í ríkisstjórn eða ekki, að bæta vinnubrögð á Alþingi svo um munar. Það þýðir að hlusta í báðar áttir. Það þýðir líka að við þurfum að muna hvað okkur fannst illa fram við okkur komið og ekki nota það til baka heldur þvert á móti sýna að það er hægt að gera hlutina betur hér á þingi.