ráðstöfun eignarhlutar í Íslandsbanka hf.

Hæstv. forseti. Er það ekki dæmalaust að það virðist ekki vera hægt að greiða fyrir innviði og annað slíkt með arði af eignum, sameiginlegum eignum þjóðarinnar, arði sem mun vera hátt í 50 milljarðar á árinu 2024 ef við tökum mark á fyrsta ársfjórðungi þar sem hreinn hagnaður Íslandsbanka var 5,4 milljarðar kr.? Í fyrra var hagnaður bankans tæpir 5 milljarðar kr. Er það ekki merkilegt að þetta samfélag skuli alltaf vera nógu gott til að hirða upp duft og rusl sem í rauninni eru gjaldfallnir bankar eftir bankahrunið 2008? Síðan eiga skattgreiðendur að byggja allan kastalann upp og nú á að einkavæða hann. Við í Flokki fólksins erum ekki hrifin af því hvernig farið er með almenning í þessu landi, hvernig við erum fótumtroðin ítrekað þar sem hagnaðurinn okkar er einkavæddur á meðan við erum nógu góð til að reisa við tapið.