veiðar í fiskveiðilandhelgi Íslands og stjórn fiskveiða.

Virðulegi forseti. Það er ekki einu sinni veiðiskylda á kvótaúthlutuninni. Hvað með þá sem vilja veiða en hafa ekki kvóta? Af hverju mega þeir þá ekki fara að veiða? Á undanförnum árum hefur ekki veiðst upp í kvóta. Það er talað um að rökin séu fyrirsjáanleiki, hámarkshagkvæmni og að þetta sé gott fyrir reksturinn. Af hverju förum við ekki að kvótasetja fleiri atvinnugreinar, t.d. pítsur? Segjum að það megi vera með 50 pítsustöðvar hérna í bænum, eitthvað slíkt. Það eykur fyrirsjáanleika í rekstri. Einhver sem veit eitthvað um atvinnufrelsi í landinu veit að það er undir einstaklingnum sjálfum komið. Það er atvinnufrelsi.

Ég heyrði í ungum sjómanni í gær. Hann ætlaði 100% að fara að kaupa sér bát til að geta farið á grásleppu og strandveiðar saman en hann er hættur við núna. Hann getur það ekki núna. Hér er verið að kvótasetja þetta með þeim hætti að það má framselja innan svæðisins. Við erum með breytingartillögu í því máli vegna þess það eru engin rök fyrir framsali á kvóta, engin. (Forseti hringir.) Löggjafarvaldið er bara að búa til fjármuni sem einstaklingar mega svo selja á markaði. Það á ekki að gera það þannig. Lög eru ekki til þess.