fjárlög 2025.
Virðulegur forseti. Ég vil þakka hæstv. ráðherra framsöguna. Ég verð að gangast við því að mér þykir sá tónn ekki sleginn í þessu frumvarpi sem ég held að geti orðið til raunverulegs gagns við slaginn við verðbólguna og verðbólguvæntingarnar. En mig langar til að spyrja hæstv. ráðherra um tvennt í fyrra andsvari. Í fyrsta lagi vísar hæstv. ráðherra oft til þess að þessi fjárlög tali saman við fjármálaáætlun sem var samþykkt hér undir lok þings í júní. Fjármálaráð gerði umtalsverðar athugasemdir við þá fjármálaáætlun og sagði m.a., með leyfi forseta: „Minna aðhald er í ríkisrekstri hér en í samanburðarlöndunum.“ Fjármálaráð hélt síðan áfram og sagði: „Fjárhagsleg afkoma hins opinbera er veik, ekki síst vegna mikils útgjaldavaxtar undanfarin ár.“ Og að endingu: „Útgjaldavöxtur síðustu ára er ósjálfbær.“ Þetta eru býsna afgerandi sjónarmið sem koma þarna fram hjá fjármálaráði. Ráðherra leggur mikla áherslu á að fjárlögin spili saman við fjármálaáætlun sem þessar miklu athugasemdir komu fram við. Hvernig þykir hæstv. fjármálaráðherra komið til móts við þessi sjónarmið fjármálaráðs? Ekki var það gert í fjármálaáætluninni við samþykkt hennar í sumar.
Ef tími gefst til þá vildi ég gjarnan að hæstv. ráðherra upplýsti okkur um það sem hann kom inn á í ræðu sinni, að það væri búið að leggja til að 2,2 milljarðar færu í rekstur almenningssamgangna á höfuðborgarsvæðinu í samkomulagi sem var undirritað núna við uppfærslu samgöngusáttmálans. Þá virðist ríkissjóður hafa skuldbundið sig til að hækka þá greiðslu þegar borgarlínulestirnar fara að keyra. Getur hæstv. ráðherra útskýrt aðeins hvað í því felst?
