fjárlög 2025.

Forseti. Í ársskýrslu umboðsmanns Alþingis er áhugaverður kafli um stjórnunar- og eftirlitshlutverk ráðherra sem mig langar til að spyrja hæstv. forsætisráðherra út í vegna lögbundinna verkefna sem fjárlagafrumvarpið á að fjármagna. Það er ein helsta ástæða þess að við þurfum að glíma við þessi fjárlög. Þar segir, með leyfi forseta:

„Ef yfirstjórn og eftirliti með tiltekinni stjórnsýslu er ábótavant yfir lengra tímabil kann að skapast ástand þar sem tiltekin stofnun starfar meira eða minna á eigin forsendum án tillits til annarra þátta stjórnsýslunnar. Samkvæmt stjórnskipuninni eiga slík „fríríki“ innan stjórnsýslunnar ekki að geta orðið til. Ýmis mál sem koma til kasta umboðsmanns benda hins vegar til meiri eða minni veikleika innan stjórnsýslukerfisins að þessu leyti.“

Hann klárar þennan kafla, með leyfi forseta, með: „… til marks um kerfislægan vanda innan stjórnsýslunnar og þá ekki síst æðsta stigs hennar, Stjórnarráðsins.“

Umboðsmaður Alþingis fjallaði um það í viðtali í Sprengisandi hér á dögunum hvernig það eigi ekki að vera tólf mismunandi ríkisstjórnir, að hver ráðherra sé ekki það sjálfstæður að við séum í raun og veru með tólf ríkisstjórnir. Við erum með hæstv. forsætisráðherra sem ber, eins og það er nokkurn veginn orðað, ábyrgð á ákveðnum vef eftirlits, að ríkisstjórnin sé með ákveðinn vef sem bindur hana saman og passar upp á að þetta eftirlit verði ekki eins og hér er lýst, þessi kerfislægi vandi. Mig langar einfaldlega til að spyrja hæstv. ráðherra þeirrar einföldu spurningar: Telur ráðherra þetta fjárlagafrumvarp dekka þau lögbundnu verkefni sem Alþingi hefur samþykkt, bæði rekstrarlega og fjárhagslega, á þann hátt að þetta sé ekki fjárlagafrumvarp sem leggur til skerðingu á þjónustu miðað við lögbundin réttindi?