fjárlög 2025.

Virðulegur forseti. Já, við skulum vona heitt og innilega að þeir ætli nú að taka á víxlverkunum lífeyrissjóða vegna þess að við þekkjum þá hörmungarsögu sem var þess valdandi á sínum tíma að þessi jöfnunarsjóður var tekinn upp.

Í greinargerð með fjárlagafrumvarpinu stendur í kafla um eldri borgara:

„Afgangur hefur verið á málefnasviðinu allt frá árinu 2018 vegna aukinna tekna ellilífeyrisþega. Við það skapast svigrúm sem er m.a. nýtt til að hækka almennt frítekjumark ellilífeyris um 46%.“

Maður myndi nú halda þegar maður sér svona að þarna væri búið að hafa af ellilífeyrisþegum aukatekjur frá 2018, vegna þess að þeir hafa fengið hærri laun — milljarða. Og þegar maður sér svona, 46%, þá hugsar maður: Vá, það hlýtur að vera svakaleg tala þarna á bak við, en það eru ekki nema 11.500 kr. Það er verið að fara með þetta úr 25.000 kr. í 36.500 kr. Ef búið væri að uppreikna þessa tölu væri hún sennilega í kringum 60.000–70.000 kr. að lágmarki og ætti að vera einhvers staðar um 100.000 kr. vegna þess að það er það sem eldri borgarar, konur aðallega, eru að fá úr lífeyrissjóðum. Að vera tilbúinn til að gefa bara helminginn af því eftir en skerða hitt — það skil ég ekki. Ég spyr hæstv. ráðherra: Hvers vegna í ósköpunum er það þannig? Og getur hann sætt sig við það að þegar þessi ríkisstjórn komst til valda voru skerðingarnar í kerfinu að meðaltali undir 50 milljörðum en eru komnar yfir 100 milljarða í dag? Ríkið er að spara sér yfir 100 milljarða. Þeir skila til baka 2,7 milljörðum og telja sig standa sig alveg rosalega vel.