fjárlög 2025.

Virðulegi forseti. Lengi býr að fyrstu gerð, segir máltækið. Atlæti og upplifanir í bernsku geta haft áhrif langt fram á fullorðinsár og litað líf fólks, bæði sem einstaklinga og samfélagsþegna. Samkvæmt nýlegum rannsóknum hafa 13% barna í sjöunda bekk grunnskóla á Íslandi orðið fyrir ofbeldi og 18% barna hafa lent í slagsmálum á síðastliðnum 12 mánuðum. Sjö tilfelli heimilisofbeldis eru tilkynnt lögreglu á degi hverjum og má telja nánast öruggt að börn komi við sögu í einhverjum þeirra. Það er ekki bara skaðlegt fyrir börn að verða fyrir ofbeldi. Að verða vitni að því hefur ekki síður alvarlegar afleiðingar. Hnífar og barefli hafa fundist á börnum í grunn- og framhaldsskólum og starfsfólk skóla hefur lýst áhyggjum af auknu ofbeldi meðal yngri nemenda, jafnvel á yngsta stigi grunnskóla. Tilkynningum í málum þar sem barn beitir ofbeldi fjölgaði um 12,6% árið 2023 frá fyrra ári og má ætla að þeim tilkynningum hafi fjölgað enn meira í ár. Stjórnvöld hafa ákveðið að fjölga aðgerðum vegna ofbeldis meðal barna og gegn börnum. Ljóst er að verkefnið er viðamikið og snertir mörg svið samfélagsins og þar af leiðandi mörg ráðuneyti. Aðkoma dómsmálaráðuneytisins er mikilvæg því að oft er það lögreglan sem sinnir fyrsta viðbragði í slíkum málum, auk þess sem ákæruferli, varðhald og eftir atvikum refsingar verða á forræði ráðuneytisins.

Mig langar að spyrja hæstv. ráðherra: Hvaða aðgerðir eru það sem hennar ráðuneyti mun grípa til til að bregðast við stöðunni sem við horfum upp á í samfélaginu?