fjárlög 2025.
Virðulegi forseti. Þar sem tíminn er knappur ætla ég að reyna að fara hratt yfir á þessum tveimur mínútum, reyna að koma örlítið inn á þau málefnasvið sem heyra undir mitt ráðuneyti. Í fyrsta lagi eru það íþrótta- og æskulýðsmál, ég ætla að fara aðeins yfir breytingarnar sem þar eru. Þar eru stærstu breytingarnar þær að gert er ráð fyrir fjármagni á næsta ári til þjóðarleikvanga, m.a. í þjóðarhöll sem nú er í forvali fyrir hönnunarútboð. Hönnunarútboð á að geta hafist á allra næstu vikum. Annars staðar er gert ráð fyrir aukningu til afreksíþrótta upp á 250 milljónir.
Stærsta svið ráðuneytisins eru framhaldsskólarnir en 40–50 milljarðar fara til þess málaflokks. Gert er ráð fyrir að málaflokkurinn fari úr 44 milljörðum í 47 milljarða. Stærstu verkefnin eru að við erum að halda áfram að efla verknámsskólana. Það er aukning til að mæta auknum fjölda nemenda í verknámi. Það er líka gert ráð fyrir því að við séum að halda áfram framkvæmdum við verknámsskóla. Nýlega settum við byggingu við fjóra skóla af stað og eigum að geta haldið áfram með næsta skammt í því. Einnig er gert ráð fyrir því að stíga skref inn í gjaldfrjáls námsgögn sem er frumvarp sem á að koma til þingsins, efla stuðning inn í framhaldsskólakerfið til að mæta jaðarsettum hópum, fjölga íslenskubrautum við skólana, taka betur utan um jaðarsetta nemendur, sem eru í svokölluðum NEET-hópi, efla menntun fanga o.s.frv.
Málefnasvið 22: Þar er leik- og grunnskólinn, þar er umtalsverð aukning á næsta ári til að mæta þróunarverkefnum en á yfirstandandi ári renna rúmlega 900 milljónir til leik- og grunnskólastigsins en gert er ráð fyrir að það fari í 1,4 milljarða, sem er 55% hækkun. Það er alveg hægt að segja það hér að prósentuhækkunin er mikil en krónutöluhækkunin mætti vera meiri. Við gerum ráð fyrir því að þetta aukna svigrúm verði nýtt til að innleiða nýtt samræmt námsmat í grunnskólakerfinu, til að geta keypt prófagrunna og fylgt innleiðingunni eftir í gegnum nýja Miðstöð menntunar og skólaþjónustu. Það er líka gert ráð fyrir því að geta eflt námsgagnaútgáfu með nýjum heildarlögum um námsgögn sem eru komin hingað inn til þingsins. Samhliða þeim lögum ráðgerum við að á næsta ári verði þróunarsjóður námsgagna og námsgagnasjóður báðir tvöfaldaðir. Eitt stærsta verkefnið, sem einnig er þarna undir, er inngilding barna með erlendan tungumála- og menningarbakgrunn. Þar erum við að byggja á einum af fyrstu verkefnum nýrrar Miðstöðvar menntunar og skólaþjónustu sem kallast MEMM-verkefnið, þar sem farið var í þétt samstarf við Miðju máls og læsis. Miðja máls og læsis er að renna inn í Miðstöð menntunar og skólaþjónustu og markmiðið með því verkefni til næstu tveggja til þriggja ára er að samhæfa móttöku barna í grunnskólakerfinu allt í kringum landið. Sú vinna er komin á fullt en ég vil bara ítreka það hér að þetta er sá málaflokkur sem ég held að við sem samfélag, bæði ríki og sveitarfélög, þurfum að fjárfesta miklu meira í en við gerum í dag. Þá undirstrika ég að ég er bæði að tala um ríkið og sveitarfélögin. Við þurfum að rýna betur hvað við erum að fá fyrir fjármunina sem fara þarna inn og hvaða aðferðir og hvaða verkfæri nýtast best í þessu samhengi, og það er m.a. hlutverk þessa verkefnis.
Síðan er það málefnasvið 29, sem er málefnasvið fjölskyldunnar. Það sem þar heyrir undir eru málefni barna. Við erum að halda áfram innleiðingu laga um farsæld barna og erum að komast á þann stað að við eigum að geta farið að beita því vopni. Það eru komnir málastjórar og tengiliðir allt í kringum landið þannig að við gerum ráð fyrir því á þessu ári og næsta að geta farið að stíga inn á ákveðin svæði, taka á ákveðnum áskorunum þvert á kerfi, m.a. í ofbeldismálum.
Síðan er eitt sem mig langar að koma inn á — ég næ því ekki. Ég reikna með að spurt verði út í það, það varðar börn með fjölþættan vanda. Ég verð illa svikinn ef hv. þingmenn spyrja mig ekki út í það í spurningunum hér á eftir.
