fjárlög 2025.

Virðulegur forseti. Ég þakka hv. þingmanni fyrir innleggið. Mitt mat er það að hv. þingmaður þarf ekkert að fara einhverjar krókaleiðir til að spyrja mig um efni máls. Það er mín skoðun að þótt hér séu fjárlögin undir hljótum við líka að vera að ræða stjórnmálin og þurfum ekkert að vísa til þess að vera að skoða einhvern fjárlagalið. Mér fannst hv. þingmaður nálgast það þannig og ég veit að ásetningurinn var góður. Þetta er unnið með þeim hætti að reynt er að meta allar tillögurnar. Sumar eru á hugmyndastigi og það er tekið skýrt fram. Nálgunin er sú að við getum sagt að það sé ákveðin rauð lína í gegnum allt saman, t.d. er einföldun regluverks rauð lína í gegnum alla áætlunina, en síðan eru mismunandi aðgerðir þar sem reynt er að meta hvort tveggja, bæði það hver kostnaðurinn er en sömuleiðis losunin, sem er svona kjarni máls. Nálgunin er sú að fara fyrst í það sem er hagkvæmast að gera og skilar mestu. Þetta er svipað eins og með útdeilingu úr Orkusjóði. Þá greiða menn það hvað menn fá fyrir hverja krónu í losun í viðkomandi úthlutunum eins og hægt er. Þess vegna er þetta samspil atvinnulífs og sérfræðinga í ráðuneytinu og undirstofnunum, til að við séum með plagg sem er sannarlega lifandi, þar sem við sjáum hvert vægi hverrar aðgerðar er fyrir sig en sömuleiðis kostnaðurinn, því að það segir sig sjálft að það er ekki skynsamlegt að fara í eitthvað sem er óheyrilega dýrt og skilar litlu. Jafnvel eru hugmyndir þarna sem við vitum að við getum ekki farið í núna af því að tæknin er t.d. ekki tilbúin, en það breytir því ekki að menn fari strax að velta þessu fyrir sér því að við munum sjá mjög miklar breytingar til batnaðar þegar kemur að tækni á þessu sviði.