fjárlög 2025.

Virðulegi forseti. Ég þakka hv. þingmanni fyrir. Hann bendir réttilega á að í fyrsta skipti hefur aðgerðaáætlun verið unnin með þessum hætti. Þetta er nokkuð sem er þekkt í öðrum löndum en við höfum ekki gert áður. Það er almenn regla að menn vinni þetta með þessum hætti og því var auðvelt að leita að fyrirmyndum, en því miður höfum við ekki borið gæfu til þess þangað til núna að láta stjórnvöld og atvinnulíf vinna saman í þessu.

Það er augljóslega ekki hægt að fara eftir öllum umsögnum því að þær eru ekki allar eins. Þriggja mánaða samráðsferli til að gefa aðilum tækifæri til að koma með sínar ábendingar er gert til þess að fá ábendingar. Síðan tekur ráðuneytið saman umsagnirnar og vinnur úr þeim fyrir verkefnisstjórn svo að hún geti nýtt þær í vinnu við fullmótun og forgangsröðun aðgerða. Þetta er held ég eitthvað sem er þekkt og allir vita.

Pólitíska markmiðið um 55% samdrátt fyrir 2030 í samfélagslosun er eitthvað sem allir vilja sjá en núna erum við í fyrsta skipti farin að greina þetta þannig að við getum gert raunhæfar áætlanir og vitum hvað liggur þar á bak við. Við skulum ekki gleyma því að skuldbindingar okkar eru miklu lægri. Þær eru einungis um 29% núna og geri ég ráð fyrir að þær verði um 40%. Aðalatriðið er að núna erum við með tæki til að geta tekið ákvarðanir um það hvað við ætlum að gera í hverju máli fyrir sig og þetta er lifandi plagg, ekki stjórnarskrá. Þetta er eitthvað sem breytist eftir því sem aðstæður breytast, en núna erum við komin með miklu betri leiðarvísi en við höfum haft nokkurn tíma áður þegar kemur að loftslagsmálum.