Húsnæðisliðurinn í vísitölu neysluverðs.
Frú forseti. Það er eiginlega ekki hægt annað en að halda því til haga við þessa umræðu hver áhrif ríkisfjármálanna eru á það sem við okkur blasir í slagnum við verðbólguna, verðbólguvæntingarnar og í framhaldi af því stýrivexti Seðlabankans. Það hefur ekki farið fram hjá neinum að misserum saman hefur Seðlabankinn bent á hversu einn hann hefur talið sig vera í slagnum við verðbólguna, verðbólgudrauginn sem er þaulsetnari hér en í þeim löndum sem við berum okkur helst saman við í þessum efnum. Ég hefði gjarnan viljað sjá aðhaldssamari fjárlög sett fram núna af hendi ríkisstjórnarinnar og hæstv. fjármálaráðherra, fjárlög sem settu okkur á þann stað að hér væri gert ráð fyrir hallalausum fjárlögum. Það eru skilaboð sem munu verða til gagns í þessum efnum og munu slá hratt á verðbólguna. En að því sögðu, af því að við erum að ræða hér bara húsnæðisliðinn í verðbólgumælingunni, það er umfjöllunarefnið hér í dag, þá verður það alltaf með þeim hætti að húsnæði í heild sinni verður ekki tekið út úr vísitölunni. Það er þessi fjárfestingarhluti sem um ræðir. Þá kemur á móti einhver rekstur fasteignarinnar í staðinn eða leiga eða hvernig sem sú útfærsla er og það er miklu líklegra að sá liður hreyfist í takti við aðra liði verðmælinga heldur en fjárfestingarhlutinn, sem er þessi bjögun sem hefur verið bent á árum saman og miklar og skynsamlega fram settar efasemdir eru um að eigi þar heima eða sé skynsamlegur mælikvarði á þróun kostnaðar neysluverðs.
