Störf þingsins.

Virðulegi forseti. Það þarf að rannsaka áhrif og skaða af fákeppni á bankamarkaði. Mörgum var brugðið þegar Arion banki tilkynnti að eigendur bankans hefðu hækkað arðsemiskröfu sína og því yrði bankinn að hækka vexti íbúðalána þrátt fyrir óbreytta stýrivexti. Með öðrum orðum: Sækja meira fé í vasa viðskiptavina sinna. Í fyrra skiluðu stóru bankarnir þrír 83,5 milljörðum í hagnað, þeim mesta frá hruni. Þessar tekjur voru að uppistöðu vaxtatekjur. Hagnaður Arion banka á árinu 2023 nam 25,7 milljörðum kr. og var eigendum greiddur um 13 milljarða kr. arður. Í júní var hagnaður bankans vegna fyrri hluta ársins kominn í 9,9 milljarða. Á sama tíma berst þorri viðskiptavina bankans sem hefur hjá þeim húsnæðislán í bökkum vegna verðbólgu og hárra vaxta. Hjá mörgum losna samningar um óverðtryggð húsnæðislán um næstu mánaðamót, sem mun valda stökkbreytingu á afborgunum lána með tilheyrandi forsendubresti og greiðsluerfiðleikum. Margir til viðbótar verða neyddir í verðtryggð lán að afarkostum til að halda niðri greiðslubyrði lána og komast af. Þetta eru gríðarlega miklar hækkanir á skömmum tíma án réttlætingar á þjóð í greipum fákeppni á bankamarkaði. Arion banki steig fyrstur fram gegn viðskiptavinum sínum, svo kom Íslandsbanki, sem er enn að hluta í eigu þjóðarinnar. Verður Landsbankinn, sem er í sameiginlegri eigu þjóðarinnar, næstur? Slæst þjóðin í hóp þeirra eigenda bankanna sem hækka arðsemiskröfu sína og vexti til að hafa meira fé af fólki sem getur ekki leitað annað og sætir sameiginlegum afarkostum stóru bankanna? Erum við að horfa upp á samráð stóru viðskiptabankanna á fákeppnismarkaði gegn fólkinu í landinu? Það er tímabært að skipuð verði þingnefnd til að rannsaka starfsemi þeirra. Hér þarf Samkeppniseftirlitið einnig að stíga inn, (Forseti hringir.) efnahags- og viðskiptaráðherra, stjórnvöld að hysja upp um sig (Forseti hringir.) við innleiðingu EES-tilskipunar um neytendavernd og fjármálaþjónustu en á engu sviði er frammistaðan þar verri.