Húnavallaleið.

Frú forseti. Það er nú bara þannig að mesta umferðaröryggið fæst með því að stytta leiðir, keyrða kílómetra. Þegar ég var að skoða þetta sem mest fyrir um 11–12 árum þegar ég var í bæjarmálunum á Akureyri, var bæjarfulltrúi, var það áhugavert að þegar við skoðuðum ákveðna vegkafla á Íslandi þá var að meðaltali 1,3 slys á hverja milljón ekna kílómetra á þjóðvegi eitt. Þessi kafli þarna í norðanverðum Langadal frá — hvað heitir það? Fagrihvammur eða Fagrakot? Fagrihvammur, er það ekki? (ÞorM: Fagranes.)— Frá Fagranesi á Blönduósi, það var hættulegasti kaflinn milli Akureyrar og Reykjavíkur. Hann var með tvö slys á hverja milljón ekna kílómetra.

Það sem ég ætlaði kannski rétt að koma inn á, vegna þess að sá sem hér stendur veit allt um tengivegi og hefur mikið pælt í því í umhverfis- og samgöngunefnd og unnið mikið varðandi þau mál, er að það er önnur leið sem er líka gríðarlega hagkvæm. Það er að leggja veg sem er 29 km og 15 km stytting og þá myndi fást bundið slitlag á Svínvetningabrautina og klárað að endurnýja brúna við endann á norðanverðum Blöndudal og þar yfir sem yrði mikil búbót fyrir heimasveitina. Það er líka hægt að skoða þá leið. Hún yrði líka gríðarlega arðsöm, yfir 10%. Ég held að heimamenn gætu aldrei neitað að fá þá framkvæmd vegna þess að þá erum við að tala um að það væri komið bundið slitlag alla þessa leið.

Hér síðar í dag mæli ég fyrir uppbyggingu Kjalvegar sem ég er sannfærður um að sé eitt stærsta mál fyrir Norðvesturland sem hægt væri að fara í, út frá þeim hagsmunum. Við tökum þá umræðu á eftir en þá væri þetta í beinu framhaldi af þessari B-leið. Ég hef komið mikið með þetta. Þetta er hins vegar alveg þekkt leið, þessi B-leið, sem væri að leggja 29 km veg og stytta hann um 15 km og það myndi styrkja sveitirnar enn meira við Svínavatnið og þarna í kring. Svo má ekki gleyma að það er líka hægt að fara niður með Laxárvatninu frá þessum vegi og þá eru það ekki 12 eða 15 km, það er styttri leið.