ársreikningar.
Virðulegi forseti. Ég mæli hér fyrir frumvarpi til laga um breytingu á lögum um ársreikninga, nr. 3/2006. Auk mín eru flutningsmenn á frumvarpinu Sjálfstæðismennirnir og hv. þingmenn Hildur Sverrisdóttir, Jón Gunnarsson, Óli Björn Kárason, Njáll Trausti Friðbertsson, Vilhjálmur Árnason, Bryndís Haraldsdóttir, Berglind Ósk Guðmundsdóttir og Teitur Björn Einarsson. Maður getur varla ímyndað sér betri meðflutningsmenn.
Frumvarpið felur í raun í sér bara lítils háttar breytingar, en þær geta skipt sköpum fyrir lítil fyrirtæki á Íslandi. Frumvarpið felur sem sagt í sér að verið er að leggja til að uppfæra stærðarmörk örfyrirtækja samkvæmt lögum um ársreikninga. Lagt er til að viðmið um heildareign, hreina veltu og meðalfjölda ársverka örfélaga hækki í samræmi við ársreikningatilskipun Evrópusambandsins. Jafnframt er lagt til að námundað verði til hækkunar við útreikning viðmiða um heildareign og hreina veltu lítilla, meðalstórra og stórra félaga og samstæðna.
Glöggir taka kannski eftir því að ég er að vísa hér í ársreikningatilskipun ESB. Máli- er nefnilega það að þegar sú tilskipun var innleidd hér í samræmi við EES-samstarfið þá var ákveðið hér, íslensk stjórnvöld ákváðu það, að stærðarmörk þeirra skyldu vera lægri en tilskipunin kvað á um. Það var sannarlega heimilt að ganga lengra en lágmarksviðmið ESB og auðvitað stukku íslensk stjórnvöld á það. Með frumvarpi þessu er sem sagt lagt til að stærðarmörk þessara félaga verði leiðrétt svo að íslensk lög gangi ekki lengra en umrædd tilskipun Evrópusambandsins. Sú sem hér stendur hefur reyndar reynt að vekja athygli ráðamanna hér á þessari stöðu en ekki hlotið nógu góðan hljómgrunn.
Ýmsar kvaðir geta nefnilega fylgt stærð félaga. Breytingin sem hér er lögð til einfaldar reikningsskil margra fyrirtækja hérlendis sem verða með þessu skilgreind sem örfélög í stað lítilla félaga, alveg eins og á meginlandinu. Örfélögum er heimilt að láta semja rekstraryfirlit og efnahagsyfirlit sem eru byggð á skattframtali þeirra í stað ársreiknings. Þau teljast gefa glögga mynd af afkomu félagsins. Það er mun einfaldari aðferðir við reikningsskil og kostnaður örfélaga við reikningsskil er alla jafna miklu minni en annarra stærri félaga. Það að íslenskt samfélag státi af hlutfallslega fleiri örfélögum en önnur lönd, sem fámennt land með lítið hagkerfi, ætti að mati flutningsmanna ekki að leiða til þrengri skilgreiningar á hugtakinu hér á landi en viðgengst í Evrópusambandinu.
Loks er lagt til með frumvarpi þessu að stærðartakmörk sem koma fram í lögum um ársreikninga hækki til samræmis við 34. gr. sömu tilskipunar ESB. Flutningsmenn telja einfaldlega að það sé ótækt að íþyngjandi kvaðir séu lagðar á félög á Íslandi umfram það sem viðgengst á samanburðarmörkuðum í ESB.
Tilefni þessa frumvarps er íþyngjandi innleiðing EES-gerða en þær eru allt of oft innleiddar hér á landi með meira íþyngjandi hætti en EES-samstarfið gerir kröfu um. Það er gengið lengra en regluverk Evrópusambandsins gerir kröfu um. Slík vinnubrögð hafa verið nefnd gullhúðun eða blýhúðun og fara jafnvel í bága við reglur Alþingis um þinglega meðferð EES-mála. Þannig göngum við lengra en Evrópusambandið þegar kemur að ýmsum kröfum, en þegar regluverk okkar reynist meira íþyngjandi en nýjar reglur Evrópusambandsins þá er ekki talin nein ástæða til að endurskoða íslenskt regluverk. Það er mat flutningsmanna að innlend fyrirtæki eigi að sitja við sama borð og önnur fyrirtæki á innri markaði Evrópusambandsins. Auk þess koma íþyngjandi og óskilvirkar reglur sem eru sagðar stafa frá EES-samstarfinu óorði á samninginn um Evrópska efnahagssvæðið. Það er nefnilega þannig að þegar verið er að innleiða þessar reglur er það matreitt á þann hátt að þetta séu reglur frá Evrópusambandinu og þannig verður almenn vitneskja og vitund fólks og fyrirtækja sú að það sé verið að innleiða hér ríkulegar kvaðir sem stafi beint frá Brussel en reynist síðan ekki að vera svo. Því leggjum við flutningsmenn til framangreindar breytingar til að vinda ofan af gullhúðun eða blýhúðun og samræma íslenskt regluverk við regluverk annarra landa á innri markaði Evrópusambandsins. Við erum hreinlega að gera þá kröfu að fyrirtæki á Íslandi sitji við sama borð og fyrirtæki í Evrópusambandinu.
Að lokinni þessari umræðu legg ég til að málið verði sent til hv. efnahags- og viðskiptanefndar.
