Störf þingsins.

Virðulegi forseti. Enginn sómi er að þingmálaskrá hæstv. ríkisstjórnar hvað menntun og líðan barna varðar. Er bráðavandinn virkilega ekki ljós? Við erum sem samfélag að bregðast börnum og ungmennum. Í málaflokknum ríkir neyðarástand. Íslenska æskulýðsrannsóknin staðfestir það. Með leyfi forseta: 75% stúlkna í tíunda bekk finna fyrir kvíða vikulega eða daglega, 75%, þar af 34% daglega. 40% stúlkna í tíunda bekk finna fyrir depurð vikulega eða daglega, þar af 17% daglega. Ungmenni eru meira einmana heldur en elsti aldurshópurinn á Íslandi. Er þetta ávarpað í þingmálaskrá? Svarið er nei. Hornsteinn íslenskunnar, lýðræðis og nýsköpunar er lesskilningur. Hvar standa íslensk 15 ára börn hvað þetta varðar samkvæmt OECD? Tæp 50% drengja eru ekki með grunnfærni í lesskilningi. Um helmingur drengja er ekki með grunnfærni í lesskilningi á gnægtarlandinu Íslandi. Rúm 30% stúlkna eru á sama stað. Og til að bíta höfuðið af skömminni þá voru tæp 30% 15 ára barna ekki með grunnfærni í skapandi hugsun, en skapandi hugsun er það sem getur skapað mikla fjármuni fyrir okkur.

Þessi vinnubrögð hæstv. ríkisstjórnar auka stéttaskiptingu og aðra misskiptingu í samfélaginu. Ólíkt þeim erum við í Sjálfstæðisflokknum tilbúin með aðgerðir í þessum málaflokki. Við í Sjálfstæðisflokknum viljum lyfta öllum börnum og hámarka möguleika allra til jafnra tækifæra. Börn eiga ekki að gjalda stöðu sinnar eða stéttar.