Menntasjóður námsmanna.
Virðulegur forseti. Ég tek undir með hv. þingmanni. Okkur gefst nefnilega ekki nægilega oft tækifæri til að ræða menntamálin í þessum sal og þess vegna er ágætt að fara aðeins yfir þetta kerfi, þetta stuðningskerfi og hvernig það getur ýtt undir ávinning okkar af menntakerfinu og ávinning nemenda af því að sækja sér nám. Ég held að stór partur af því sem við þurfum að hugsa sé einmitt hvernig gervigreindin verður innleidd hér á landi, hvernig við veitum henni forystu, hvernig við nýtum tækifæri okkar sem lítillar þjóðar í því að mennta sérfræðinga á þessu sviði, nýtum styrkleika okkar sem lítillar þjóðar, með ríki sem ætti að geta sett það í algjöra forystu hvernig ætti að innleiða gervigreind í öllu menntakerfinu, í ríkinu, í umsýslunni og bákninu o.s.frv. Ég ætla að fá að taka undir með hv. þingmanni að ég hef aðeins áhyggjur af því að þessi ríkisstjórn setji það ekki nægjanlega mikið á oddinn, af því að núna er tíminn þar sem gervigreindarmál eru líka að verða varnarmál. Þau eru að koma inn á mjög mörgum sviðum samfélagsins og munu verða stærsti faktorinn í því hvar við stöndum í samkeppnishæfni þjóða innan skamms. Þá er menntakerfið ekki undanskilið heldur ein forsenda þess og lykilþáttur í því að við getum — en við verðum að mennta fólk í háskólunum t.d. til að geta tekist á við þessa þróun og þá þurfum við að hugsa: Hvernig styður Menntasjóðurinn við nemendur sem eru að afla sér sérfræðiþekkingar sem við svo mikið þurfum á að halda? Það er að halda aftur af okkur nú þegar í samkeppnishæfni þjóða hvað við menntum fáa í svokölluðum STEM-greinum, sem eru raunvísinda-, tækni- og stærðfræðigreinar. Maður veltir fyrir sér: Er hægt að búa til hvata með Menntasjóðinum til þess einmitt að nemendur sjái frekar hag sinn í að mennta sig með námi í því sem verður gríðarlega dýrmætt fyrir þjóðina til lengri tíma?
