Jöfnunarsjóður sveitarfélaga.

Virðulegi forseti. Það sem er verið að gera hér er að það er verið að einfalda kerfið, það er verið að gera það gagnsærra. Það er verið að byggja á því hverjir tekjumöguleikarnir eru og hverjar útgjaldaþarfirnar eru. Þetta er félagslegur jöfnunarsjóður, þetta er félagslegt jöfnunarkerfi sveitarfélaga. Þetta á rætur að rekja til fátækrahjálpar árið 1930. Þetta fékk nafnið Jöfnunarsjóður 1937 og í núverandi mynd er þetta frá 1992. Rétt er að nefna að ástæða þess að hið svokallaða fasteignaskattsframlag sjóðsins er lagt niður og sameinað hinum framlögunum, þetta er rakið ítarlega í greinargerð frumvarpsins, er m.a. að það jafnar ekki lengur tekjumöguleika sveitarfélaga af fasteignaskatti, eins og sjá má í greinargerðinni. Þetta fasteignaskattsframlag byggir á gömlum grunni og auk þess hefur framlagið lengi verið gagnrýnt. Fyrir hvað? Fyrir að vera skattahvetjandi. Við erum að leggja niður skattahvetjandi áhrif í frumvarpinu þar sem hærri álögur á eigendur fasteigna þýða hærri framlög úr sjóðnum. Þetta erum við að leggja niður. Við erum að leggja niður skattahvatann í núgildandi lögum um það að hærri álögur á fasteignaeigendur í sveitarfélögum þýði hærri framlög úr sjóðnum. Og svo kemur hv. þingmaður og segir: Nei, heyrðu, þetta frumvarp hérna er skattahvetjandi. Við erum einmitt að gera öfuga. Þetta er skattalækkandi. Þetta er hvatning til lægri skatta á íbúa sveitarfélaganna og um það má lesa vel í greinargerð frumvarpsins um fasteignaskattsframlagið sem vonandi verður lagt niður nú í sumar og verður lagt niður nú í sumar þegar lög um jöfnunarsjóð taka gildi.