Störf þingsins.

Virðulegur forseti. Sérsveit ríkislögreglustjóra sinnir gríðarlega miklu öryggishlutverki í samfélagi okkar í dag. Útköll sérsveitarinnar tólffölduðust á tíu ára tímabili og árið 2023 voru þau 461 talsins. Alls voru 2.141 vopnuð útköll á árunum 2013–2023. Ég leyfi mér að efast um að hvorki þingheimur né almenningur geri sér almennilega grein fyrir umfangi og verkefnafjölda sveitarinnar. Því vakti það mikla undrun mína að sjá í fréttum RÚV núna í apríl að hætt hafi verið við inntökupróf í sérsveitina nú í sumar vegna fjárskorts. Um 50 lögreglumenn hafa verið við þjálfun síðastliðið ár til að þreyta inntökuprófið sem átti að fara fram núna í sumar. Í dag eru 47 í sérsveitinni en eiga að vera 56.

Virðulegur forseti. Ráðherrar ríkisstjórnarinnar hafa farið mikinn og barið sér á brjóst varðandi það að fjölga í lögreglunni og auka fjármagn til öryggis- og varnarmála og er það vel. En það skýtur skökku við að sjá síðan fréttir um að ekki er hægt að fullmanna sérsveitina vegna fjárskorts. Hér fer ekki saman hljóð og mynd, virðulegur forseti. Því trúi ég ekki öðru en að þingheimur allur taki undir með mér að dómsmálaráðherra og fjármálaráðherra taki sig saman í andlitinu og kippi þessu máli strax í liðinn og sjái til þess að prófin fari fram í sumar og að sérsveitin verði fullmönnuð.