fjáraukalög 2025.
Virðulegi forseti. Það er áhugavert að heyra það sem hv. þingmaður segir. Ég held að það sé alveg rétt að þegar menn fara að skoða rannsóknarskýrsluna þá kemur í ljós að tapið er á einhverjum stöðum þar sem fólk er almennt ekki meðvitað um hvað gerðist. Þetta er löngu eftir að að sjóðurinn er stofnaður, löngu eftir lagabreytinguna sem mest er fjallað um og allir, held ég, sammála um það að það var ekki eftirlit með honum sem skyldi. En að öðru leyti, sem kemur líka fram í skýrslunni, virðist Fjármálaeftirlitið ekki hafa séð það sem var í gangi þar þrátt fyrir að hafa fengið skýrslu frá sjóðnum. Í það minnsta man ég ekki eftir því að einhvern tímann hafi verið tekin pólitísk ákvörðun um að breyta stefnu sjóðsins þannig að hann ætti að fara að lána einhverju allt öðrum heldur en þeim sem upphafleg markmið voru hjá sjóðnum.
Þetta víkur að því sem við erum að sjá núna. Við erum að sjá að við erum að taka ábyrgðina sem kannski hefur ekkert verið sérstaklega mikil eins og hún er nú þegar. Og tengslin, sem m.a. var gagnrýnt í rannsóknarskýrslunni, að Alþingi missi tengslin við skipun í stjórn sjóðsins, gerir það 1998, ef ég man rétt. Það er ýmislegt sem gerðist þar sem var alla vega ekki á hvers manns vitorði, svo ekki sé dýpra í árinni tekið. En það væri hins vegar áhugavert að vita, af því að mér finnst áherslan áhugaverð sem hv. þingmaður er hér að tala um. Hann þekkir sitt kjördæmi, eins og allir vita, eins og lófann á sér, hver staðan er núna þegar kemur að lánveitingum t.d. til kaupa á húsnæði eða jörðum. Það er nú meira af forvitni af því við erum að ræða þessi mál. Hvort hv. þingmaður gæti upplýst okkur aðeins um það hver þessi staða er. Er almenni markaðurinn að sinna þessu? Erum við enn þá á svipuðum slóðum (Forseti hringir.) og hv. þingmaður var hér að lýsa áðan?
