kostnaður vegna einstaklinga sem hafa sótt um eða fengið alþjóðlega vernd.
Virðulegi forseti. Efnahagsmálin voru klárlega fyrirferðarmesta kosningamálið í síðustu alþingiskosningum, í umhverfi verðbólgu og hárra vaxta sem höfðu reyndar verið lækkaðir. En útlendingamálin, ekki síst málefni hælisleitenda, voru líka rækilega á dagskrá. Ég vona að við hæstv. ráðherra séum sammála um það. Ágreiningur um skilvirkni í málaflokknum og landamæravörslu var reyndar meðal þess sem þáverandi forsætisráðherra nefndi sem ástæður þess að hann lagði til þingrof og snemmbúnar kosningar. Beinn kostnaður vegna útlendingamála hefur líka vaxið á ógnarhraða undanfarin ár upp í tugi milljarða króna á ári. Okkur Sjálfstæðismönnum tókst að vísu að snúa þróuninni við með nokkrum mikilvægum skrefum, en það er nóg eftir.
Við Sjálfstæðismenn höfum sannarlega verið í ríkisstjórn, ég þykist vita að hæstv. ráðherra muni minna á það. En hæstv. ráðherra þekkir það líka að við vorum frekar einmana varðandi okkar afstöðu í málefnum hælisleitenda, enda náðum við oft saman í umræðunni við fulltrúa Flokks fólksins sem hafa verið mjög háværir í þessari umræðu undanfarin ár. Þar hefur hæstv. ráðherra sannarlega látið til sín taka. Nú hefur staðan snúist við og Flokkur fólksins er kominn í ríkisstjórn. Því liggur beinast við að spyrja hæstv. ráðherra, sem ber ábyrgð á ýmsum kostnaði sem fellur til vegna hælisleitenda, hvort hún ætli að grípa til ráðstafana til að draga úr þessum kostnaði og þá hvaða ráðstafana. Þetta er auðvitað ýmiss kostnaður, þjónusta við hælisleitendur, greiðslur á vegum sveitarfélaga, reikningar á vegum Vinnumálastofnunar og fleira. Af nógu er að taka. Hvað ætlar Flokkur fólksins að gera varðandi kostnað við hælisleitendur nú þegar fulltrúar hans hafa tekið við stjórn landsins?
