fyrirkomulag strandveiða.

Virðulegur forseti. Ég kom hér upp fyrir tæpum mánuði síðan og spurði hæstv. atvinnuvegaráðherra um fyrirkomulag strandveiða, það var sem sagt 28. apríl. Nú er það þannig að strandveiðar hófust 5. maí og staðan í dag eftir um þrjár vikur af veiðum er sú að það er búið að veiða 3.193 tonn af þorski af 10.000 tonna potti, sem eru þá 31,93%. Eftir eru rúmlega þrír mánuðir eða um 12 vikur af tímabilinu, það er ekki kominn júní. Miðað við gang veiðanna í dag er hægt að áætla að 10.000 tonna potturinn verði búinn í byrjun júlí, að fyrstu dagana í júlí verði 10.000 tonna pottur hæstv. ráðherra búinn. Því langar mig að spyrja hæstv. atvinnuvegaráðherra: Hvað hyggst ráðherra gera þegar 10.000 tonna potturinn er búinn og hverjar voru tillögur Fiskistofu sem hæstv. ráðherra nefndi hér að hann ætti von á? Hverjar voru tillögur Fiskistofu í þessum efnum?