skattahækkanir ríkisstjórnarinnar.

Frú forseti. Það er orðið fremur regla en undantekning að hæstv. forsætisráðherra víki sér undan að svara einföldum og málefnalegum spurningum. Hér kemur löng ræða um hagræðingu þar sem á sama tíma er gerður starfslokasamningur við vararíkissaksóknara á yfir 300 milljónir. Er þetta nú trúverðugur málflutningur? Ég bara spyr. En skattstefna ríkisstjórnarinnar er ekki bara vangavelta því hún er raunveruleg. Á sex mánuðum hefur ríkisstjórnin nefnilega ekkert lagt fram til að styðja við verðmætasköpun heldur eingöngu lagt eitthvað fram sem hefur verið aukið álögur á heimilin, einstaklinga og fyrirtæki í landinu. Og nýyrðasmíði ríkisstjórnarinnar breytir því ekki að álögur eru auknar, byrðar eru lagðar á fleiri og róðurinn verði þyngri fyrir fjölskyldur og fyrirtæki. Skattar eru skattar, sama hvaða nafn ríkisstjórnin notar yfir það. Þessi ríkisstjórn er komin í sömu vegferð og ríkisstjórn Jóhönnu Sigurðardóttur og við munum öll hvernig það endaði þannig að sagan hefur ekki kennt hér neitt. (Forseti hringir.)

Ég spyr því aftur: Er það virkilega markmið ríkisstjórnar sem kennir sig við jöfnuð og almannahagsmuni að skattleggja landsbyggðina út af kortinu og leggja þyngstu byrðarnar á þá sem búa lengst frá höfuðborginni?