fundarstjórn forseta og slit þingfundar.

Virðulegi forseti. Hér sagði áðan hv. þm. Sigmar Guðmundsson að það væri ekkert talsamband milli þingflokksformanna. Það er bara rétt hjá honum. Ég veit að þingflokksformenn stjórnarandstöðunnar biðu í allan gærdag eftir að vera boðaðir á fund og voru aldrei boðaðir, aldrei. Ég las hér upp úr yfirlýsingu hv. þm. Hildar Sverrisdóttir rétt áðan þar sem forseti þings hafði aldrei samband í þessari viku við varaforseta til að ræða fyrirkomulag þingfunda. Ég get sagt það, af því að hér hafa forsætisráðherra, þingmenn stjórnarmeirihlutans og ráðherrar farið mikinn í morgun og talað um hvað þau hafa lagt mikið á sig til að ná þinglokasamningum, að fyrsti fundur formanna ríkisstjórnarflokkanna var haldinn 16. júní. Fundur númer tvö var haldinn 18. júní og fundur númer þrjú var haldinn 8. júlí, í fyrradag. (Forseti hringir.) Þetta er allur vilji formanna stjórnarmeirihlutans til að ræða hér við formenn stjórnarandstöðunnar. Þetta voru þrír fundir.