fjárlög 2026.

Forseti. Ég þakka hv. þingmanni fyrir fyrirspurnina og ætla kannski að stikla á stóru og fylgja síðan fleiru eftir. Við erum auðvitað á upphafsmetrunum í mótun þessarar atvinnustefnu og það er ekki þannig að ríkið ætli sér að skipta sér af öllu því sem fyrirtækin í landinu eru að gera. Í dag eru samt margir milljarðar að fara frá ríkinu í formi styrkja og ívilnana og við eigum að hugsa með gagnrýnum hætti hvernig því fjármagni er dreift þar sem ríkið er virkt í dag, hvort það sé að styðja við sjálfbærni í okkar samfélagi. Partur af því er m.a.: Erum við að leggja þessa fjármuni eða þessar ívilnanir eða þennan stuðning í atvinnuvegi sem eru háframleiðniatvinnugreinar? Og það eru margar atvinnugreinar, það er ekki bara ein tegund starfa, ein atvinnugrein sem starfar fyrst og fremst á höfuðborgarsvæðinu.

Við vitum að mikið af því sem ríkið getur gert eru auðvitað þessir litlu hlutir sem eru samt svo stórir. Þessi tiltekt t.d. hjá heilbrigðiseftirlitinu, þessi tiltekt sem snýr m.a. að leyfisveitingum í orkumálum og þess háttar; mikið af þessu snýr annaðhvort að aðgengi lítilla fyrirtækja að orku eða bara aðgengi þeirra að góðu rekstrarumhverfi, því að auðvelda daglegt líf hjá þeim fyrirtækjum. Við erum því að gera nokkra litla hluti nú þegar sem eru í takt við þetta.

Síðan erum við líka að reyna að hugsa stórt. Hvar erum við að ýta undir stór verkefni? Við erum t.d. nýbúin að auglýsa eftir verkefnastjóra sem á að sjá um stórfjárfestingar í landinu sem myndu þá koma að uppbyggingu stórra atvinnugreina. Það gæti verið orkufrekur iðnaður sem er samt grænn iðnaður, grænir iðngarðar víða um land sem hafa síðan afleidd störf. Ég veit að stálsmiðjur og alls konar minni háttar rekstur stendur oft og fellur með stærri atvinnurekstri í kringum okkur. Við sjáum það t.d. bara á Bakka að það hefur afleidd áhrif að stór iðnaður dragist saman. Þannig að við erum að hugsa stórt en það hefur afleidd áhrif og ég trúi að það verði til góðs.