fjárlög 2026.

Virðulegi forseti. Ég þakka hæstv. ráðherra fyrir andsvarið. Ég get tekið undir það að það er viðfangsefni að horfa til þess hvernig fjármunirnir verða betur tengdir við árangur. Ég held reyndar að það sé vandamál sem við þurfum að horfast í augu við, ef við horfum á menntun almennt, að það er ekki nóg að fjárfesta meira í krónutölum heldur þurfa þessir mælikvarðar og aðferðafræðin til að ná í mark að vera miklu skýrari. Ég held að það eigi við um íslenskuna en líka í miklu víðara samhengi en það. En ég vil draga það fram að sama hvað gert er þá þarf að bæta í fjármagni. Ég held það sé alveg ljóst miðað við stöðuna í dag. Ég held að það sé mikilvægt að endurskoða niðurskurð þegar kemur að íslenskukennslu fyrir innflytjendur og bæta frekar í, sérstaklega þegar við erum að horfa á grunnskólana. Ég veit, heyri það frá foreldrum, að þeir hafa áhyggjur þegar hlutfall nemenda sem talar ekki góða íslensku hækkar. Það er þá vegna álags á kennara, að það komi niður á gæðum kennslu. Gæðin eru auðvitað eitt en svo er það þessi samstaða og þessi aðgangur sem eru lykillinn sem skiptir hér mestu máli. Það er mikilvægt að við náum utan um þetta, alveg eins og hæstv. ráðherra segir, til þess að hæfileikar geti blómstrað hjá öllum í okkar samfélagi. Ég brýni því fyrir hæstv. ráðherra: Gefumst ekki upp á viðfangsefninu. Sækjum fram í fjármagni en vinnum líka saman að því hvernig við ætlum að gera þetta. Ég get sagt við hæstv. ráðherra: Það eru margar tillögur á borðinu sem má ræða. Við getum rætt það t.d. að fá eldri borgara að borðinu til að tala við, vera með viðtalstíma sem eru þá kannski skattfrjálsir, hjálpa til við að efla þeirra tekjur (Forseti hringir.) og draga úr félagslegri einangrun á móti. En ég held að við þurfum að fara að nálgast þetta viðfangsefni með miklu breiðari linsu en við höfum áður gert.