fjárlög 2026.
Virðulegi forseti. Ég þakka hæstv. ráðherra fyrir yfirferðina. Samkvæmt tillögum ríkisstjórnarinnar hækka framlög til málaflokksins talsvert frá fjárlögum fyrra árs og hlutfallslega mest allra málefnasviða. Þar vega varnartengd verkefni mest og veitir ekki af á þessum viðsjárverðu tímum. Sú sem hér stendur var aðstoðarmaður utanríkisráðherra Sjálfstæðisflokksins þegar alger viðsnúningur varð þegar kemur að áherslu á öryggis- og varnarmál og uppbyggingu á því málefnasviði. Þetta var áður en allsherjarinnrás hófst á ríki í okkar álfu og löngu áður en leiðtogar ESB vöknuðu loksins af værum svefni í öryggis- og varnarmálum. Þar var bæði um að ræða breytta stjórnsýslu, mikla uppbyggingu á varnarinnviðum en líka stóraukin samskipti við bandalagsþjóðir, ekki síst við Bandaríkin. Þótt ásetningurinn og áherslan sé góð langar mig að brýna hæstv. ráðherra varðandi utanumhaldið og meðferð fjárins og hafa augun á því að fjármunirnir nýtist vel, að vel sé farið með skattfé sem er veitt í þennan málaflokk. Við þurfum ekki að blása enn frekar út stjórnsýslu og báknið heldur er markmiðið auðvitað það að verja sannarlega þjóðina sem er frumskylda stjórnvalda.
Sama má segja um aukin framlög til þróunarsamvinnu. Við vitum af reynslunni, m.a. nýlegri reynslu, hversu mikilvægt það er að hafa virkt eftirlit með fjármunum og verkefnum í þróunarsamvinnu. En það er eitt sem mig langar að spyrja hæstv. ráðherra út í á grundvelli þessa fjárlagafrumvarps. Ég get ekki séð að gert sé ráð fyrir útgjöldum vegna þjóðaratkvæðagreiðslu í tengslum við aðild að Evrópusambandinu og þingsályktunartillögu um slíka atkvæðagreiðslu var heldur ekki að finna á þingmálaskrá. Má þá slá því föstu að þjóðaratkvæðagreiðsla í tengslum við ESB verði ekki á árinu 2026?
