fjárlög 2026.

Ég þakka hv. þingmanni fyrir góða fyrirspurn og það er alveg rétt að því lengur sem einstaklingurinn er í vanvirkni og fær ekki aðstoð þá eru meiri líkur á því að hann festist í þessu atvinnuleysiskerfi og eigi erfitt með að komast í virkni úti í samfélaginu og svo er ekkert öryggi sem tekur við eftir þessa 30 mánuði sem nú eru í gildi og í rauninni bara sorgleg staða. En það er alveg rétt, við munum nýta mjög mikinn hluta af því fé sem sparast til að byrja með til þess að efla og styrkja virkni og koma til móts við einstaklingana. Við munum gera allt til þess að aðstoða þá, líka við inngildingu sem lýtur að því að læra tungumálið okkar. Við munum vera með skýrara regluverk. Hjá starfsendurhæfingu VIRK hefur þegar vaxið mjög ásókn og beiðnir um að fá að komast í endurhæfingu. Nú er atvinnuleysistímabilið okkar um tvö og hálft ár sem er mjög langt í öllum samanburði, er það lengsta á Norðurlöndum. Það voru um 54% allra sem voru komin í virka atvinnu skömmu eftir að þau fóru á atvinnuleysisskrá í ársbyrjun 2023, mjög fljótlega sem þessi 54% voru komin í vinnu þannig að við sáum að það var mikill vilji til þess að verða virkur og fara í vinnu. Það voru einungis um 9% sem fóru á stuðning inn til sveitarfélaganna. Það voru áhyggjur sveitarfélaganna að með þessu móti, með því að stytta þetta tímabil atvinnuleysisbóta, yrði meiri ágangur á stuðning frá sveitarfélögunum. Við höfum litlar áhyggjur af því. Við sjáum líka að um 13% af þeim sem voru á þessu langa atvinnuleysistímabili fóru hreinlega inn í önnur kerfi og þar á meðal örorku. Það er líka mikið og stórt verkefni fram undan að greina betur í rauninni (Forseti hringir.) allan þann hóp einstaklinga sem þurfa á aðstoð að halda þannig að við komum þeim á réttan stað í kerfinu okkar og í góða virkni á ný.