fjárlög 2026.

Forseti. Fyrirséð er að framlög til Ríkisútvarpsins verða meira og minna óbreytt. Þótt ýmislegt sé boðað um að hnika til ýmsu í nálgun ríkisins gagnvart Ríkisútvarpinu þá er ekki trúverðugt að það verði neinar meginbreytingar þar á enda hefur enginn lýst yfir vilja til að breyta þessu svo nokkru nemi heldur einmitt að skoða ýmis kerfisleg atriði og annað eins. Þetta er einfaldlega pólitísk sýn ríkisstjórnarinnar. Að mínu mati er Ríkisútvarpið að verða sífellt pólitískara og það er tilfinning mjög margra úti í samfélaginu. Maður sér það nú bara á fjölda starfsfólks Ríkisútvarpsins sem tekur þátt í pólitískri umræðu og það er yfirleitt á sömu bókina lært. Þetta eru ekki íhaldssamir hægri menn sem þarna tjá sig, það er bara ljóst. Þeir sem neita því geta alveg neitað því en þá eru þeir bara eins og fiskar í vatni og sjá ekki pólitíkina vegna þess að þeir deila pólitíkinni. Þetta er staðan með RÚV.

Mest áberandi starfsmaður Ríkisútvarpsins er Gísli Marteinn Baldursson, myndi ég segja. Hann skrifar á Facebook nýlega, með leyfi forseta:

„Almannaútvarp einsog RÚV hefur aldrei verið mikilvægara en núna á tímum upplýsingaóreiðu og uppgangs þjóðernis-íhaldssinnaðra lýðskrumara, en þeir eiga það allir sameiginlegt að vilja leggja niður almannaútvarp sinna landa.“

Þetta er aldeilis yfirlýsing frá mest áberandi fjölmiðlamanni ríkisvaldsins, að Ríkisútvarpið gegni því hlutverki að, eins og þarna segir, stemma stigu við þjóðernisíhaldi hvers kyns. Svo er notað þarna orðið lýðskrumari en það eru nú lýðskrumarar víðar en á þessu sviði. Ég velti fyrir mér hvað hæstv. ráðherra segir um þessa sýn Gísla Marteins Baldurssonar og hvort hann deili henni, að Ríkisútvarpið gegni þessu hlutverki, að stemma stigu við þjóðernisíhaldi.