breyting á ýmsum lögum vegna fjárlaga 2026.

Virðulegi forseti. Ég vil þakka hv. þm. Nönnu Margréti Gunnlaugsdóttur fyrir mjög góðar spurningar. Ég er auðvitað jafnaðarmaður og hún — ja, ég veit ekki eftir hvaða hugmyndastefnu Miðflokkurinn starfar en ég kem meira frá jafnaðarstefnunni þar sem við hugsum kannski aðeins öðruvísi. Hún spyr hvaða greiningar ég er að vísa í. Þetta er á bls. 15 í greinargerðinni þar sem er farið yfir það sem ég var að nefna. Þar kemur líka fram, eins og kom líka fram í umræðunni í síðustu viku, að það eru auðvitað fyrst og fremst karlar sem eru að njóta samsköttunarinnar af því að þeir eru yfirleitt tekjuhærri þótt hjónin séu ein eining. Ég er bara að vísa í greinargerðina, ég hef engin önnur gögn. Ef þingmaðurinn telur að það sé eitthvað í greinargerðinni sem veki einhverjar spurningar og þurfi frekari greiningar við þá held ég að það væri upplagt að við í nefndinni ræddum það ef það vantar einhverjar frekari greiningar. En ég er bara fyrst og fremst að styðjast við það sem stendur á bls. 15 í greinargerðinni. Þar kemur fram: „Við álagningu opinberra gjalda 2025 nutu konur 19% af samsköttuninni en karlar 81%.“

Hv. þingmaður spyr mig hvort ég sé alfarið á móti þessari samsköttun en ég er bara að tala um í efstu þrepunum fyrst og fremst. En mér finnst við þurfa að skoða það og ræða það kannski frekar hvað við getum gert meira fyrir einstæða foreldra og ég held að það sé umræða sem við tökum ekki undir bandorminum. En ég held að við ættum að skoða aðgerðir til að sinna þeim heimilum. Það eru auðvitað oft þau heimili þar sem fátækt er mest. Það er ekki í þeirri prósentu þar sem þessi samsköttun á við.