breyting á ýmsum lögum vegna fjárlaga 2026.

Frú forseti. Ég þakka hv. þingmanni fyrir svarið, svarið sem aldrei barst því að aðalspurningin var hvort þingmaðurinn treysti sér til að útskýra fyrir mér hvernig, samkvæmt málflutningi, eins og ég nefndi áðan, hv. þm. Örnu Láru Jónsdóttur, þetta gæti nýst öðrum aðilanum en ekki hinum. Nú hef ég fengið í svari hv. þingmanns að hlutföllin eru 81% annars vegar og 19% hins vegar, en prósentan er algjört aukaatriði. Spurningin er bara: Hvernig getur þetta ákvæði gagnast bara öðrum aðilanum en ekki hinum? En ástæðan fyrir því að ég er hins vegar alveg sáttur við að fá ekki svar við þessari spurningu er sú að ég veit að það er ekki hægt að svara henni. Þetta er þannig regla að hún er gerð til að nýtast báðum, til að nýtast heimilinu.

En svo að ég hangi kannski ekki of lengi á þessu þá langar mig líka að spyrja hv. þingmann í ljósi þessarar umræðu okkar hér: Ef þetta er í lagi og við hugsum þetta svona, að við aðskiljum í raun og veru skattstofnana hjá hjónunum, verðum við þá ekki að taka það skref að aðskilja líka skattalega ábyrgð? Þetta eru tvær hliðar á sama peningnum. Það hlýtur þá að þurfa að vera þannig líka að ef annar aðilinn er ekki að standa skil á einhverjum sköttum þá sé það ekki á ábyrgð hins. Þetta er sama lögmálið. Við erum að tala um skattaumhverfi heimilisins. Í þessu tilfelli er mér, eins og yfirleitt áður, alveg nákvæmlega sama hvors kyns það er.