breyting á ýmsum lögum vegna fjárlaga 2026.
Virðulegur forseti. Ég geri mér alveg grein fyrir því að útgjaldaaukningin er að mjög stóru leyti laun. Við höfum því miður séð að laun hafa hækkað talsvert meira en kjarasamningar voru að tala um, hefur mér sýnst, og er sjálfsagt einn hluti af vítahring verðbólgunnar, alveg klárlega. Þess vegna held ég að það þurfi samhæft átak margra til að taka á þessu.
Varðandi atriðið sem mér finnst áhugavert að ræða hér í þingsal, af því að það er kannski ekki svo mikið af því gert þó að við höfum gert það í ríkisstjórn, þá var okkur eiginlega nóg boðið að horfa upp á að tölur sem við erum að vinna með virðast vera til alls staðar en hvergi nægjanlega góðar á einum stað. Við höfum til að mynda verið með húsnæðismarkaðinn sérstaklega til skoðunar í þó nokkur ár. Þá horfum við upp á það að HMS, sem eru þá sérfræðingarnir á þessum markaði, eru með eitt sett af tölum; Seðlabankinn, sem fylgist með útlánum bankanna, er með annað sett af tölum yfir nákvæmlega sama hlutinn, en það sem er verst er að Hagstofan, en við byggjum fjárlögin á þeirra tölum, samkvæmt lögum, er með þriðja settið. Þetta gengur ekki. Við höfum séð að gögn Hagstofunnar hafa ekki verið nægilega góð, það segir reynslan okkur, og tilhneiging einstakra stofnana til að byggja upp sínar eigin greiningardeildir og gagnavinnslu er mjög vond þróun. Við vorum að vinda ofan af henni með ákvörðunum á síðasta sumri í því að styrkja þá Hagstofugrunninn til þess að reyna að fá þessar upplýsingar allar á sama stað og þær væru eins gegnsæjar og skýrar og hægt væri. Það voru reyndar fleiri þættir sem við vorum að skoða þar líka, eins og varðandi fjármálaráð og fleiri þætti til þess einmitt að við værum með gögn sem við gætum rætt sem staðreyndir en ekki verið stöðugt með hártoganir um tölur hingað og þangað.
