Evrópska efnahagssvæðið.

Frú forseti. Ég vil þakka hv. þingmanni fyrir ræðuna sem var afskaplega góð og upplýsandi og ein sú besta, held ég, eða með þeim betri sem hafa verið fluttar í þessu máli hingað til, bæði á þessu þingi og því síðasta. Við búum nefnilega við þær aðstæður núna að reynsla hv. þingmanns af þessu máli er ansi góð. Hún hefur tekið þátt í umfjöllun um málið í fleiri en einu ráðuneyti. Hún hefur setið í ríkisstjórn og stjórnarmeirihluta þegar þetta mál hefur verið hér til umfjöllunar og er nú í minni hluta að fjalla um þetta mál þannig að hennar sýn á málið er ansi góð og mjög gott að hlusta á þetta. Ég er með þrjár spurningar til hv. þingmanns um þetta og svörin koma öll fram í máli hennar með ítarlegum rökstuðningi, en mig langar til að fá bara eins stutt svör við þessum þremur spurningum eins og mögulegt er. Í fyrsta lagi: Telur hún að þetta frumvarp og innleiðing bókunarinnar muni takmarka sjálfsákvörðunarrétt og fullveldi þjóðarinnar? Í öðru lagi: Telur hún að innleiðing bókunarinnar með þessu frumvarpi sé brot á stjórnarskrá? Og í þriðja lagi: Telur hún að með innleiðingu á þessu frumvarpi verði skert heimild þingsins til lagasetningar?